Aku maya nya benung kisuk gawa beketam ka pintu lebuh entua aku telepon madah ka bini aku benung ba Hospital Sarikei nganti ke ka beranak. Ukai main pengesal ati ditambah ka enggau pengaga laban ti enda kala bisi anak baka orang. Beguai-guai aku minta cuti ngagai "Tauke Kong", nasit amat laban ia nadai mayuh leman ngasuh aku cuti. Motosikal kapcai terus di"gurit" ka aku ngagai hospital. Datai aku din, peda aku entua aku ka indu agi bedau nganti tegi-tegi ba luar. Lalu aku betanya ka bakani gaya bini aku. Nadai nama-nama ko ia,agi nganti ka beranak.
Hari nyau majak tinggi-setinggi. Enda berasai perut nyau begeriuk tang enda berasai lapar laban ati cukup andal. Nyau ngalih ka lemai kena hari 2, 2 September 2008 pukul 4.04 pm, dia hari pan lalu berubah petang diserumba ka enggau ngitar ti bemunyi enggai badu-badu. Sereta nya mega, pengudah ka nganti lebih kurang dalam kandang 9 bulan lebih..dia anak aku ka terubah lalu ada.
Lebuh aku ngabas ngagai wad endur orang beranak, peda aku bisi orang ba katil mit ngimbai katil bini aku. Disilak ka aku kain ka kena orang nungkus ia, "baka enggi aku",ko dalam atiku. Cukup pengaga ati laban udah bulih purih aku ka terubah. Aku lalu ngaga nama ia, Dwaynne Wyensley Beriak.
Aku arap ka nuan ila igat, bebasa ka orang bukai, belajar ka pengidup ba dunya ngambi ka nuan ulih idup menyana baka orang bukai. Kenduai mummy nuan semampai sayau ka nuan ari maya nuan ada nyentuk ka ila-ila.
0 comments:
Post a Comment